Plantun de Prouvènço

Pèr coumpara dos planto d'encò nostre

Vicia disperma & Myosotis arvensis

Vicia disperma

Fabaceae Leguminosae

Nom en français : Vesce à deux graines.

Descripcioun :
La vesso-di-dos-grano trachis dins li tepiero seco, ermas e champino de Prouvènço séusouso. Fai de pichòti dóusso bruno un cop maduro, caupènt dos grano. Se recounèis peréu à si grapo de flour vióuleto o bluio de dos à sièis flour pourtado sus un long pecou, pamens pu court que la fueio proche. Li fueio soun acabado pèr uno vediho e li dos sepalo de darrié soun soun bèn mai courtet (e remounton) que li tres de davans (fotò).

Usanço :
Ramenten qu'èi pas counseia de manja de grano de vesso, que soun empouisounanto e dounon uno malautié néuroulougico, lou latirisme (presènci d'ODAP).

Port : Erbo
Taio : 10 à 60 cm
Fueio : coumpausado
Tipe bioulougico : Teroufite
Cicle bioulougico : Planto de l'an

Gènre : Vicia
Famiho : Fabaceae
Famiho classico : Leguminosae

Ordre : Fabales

Coulour de la flour : Vióuleto
Petalo : irreguliero
Ø (o loungour) flour : 4 à 5 mm
Flourido : Printèms

Sòu : Si
Autour basso e auto : 0 à 800 m
Aparado : Noun
Remarco : Noun
Mars à mai

Liò : Tepiero seco - Ermas - Champino
Estànci : Termoumediterran à Mesoumediterran
Couroulougi : Estenoumediterrano-Ouèst
Ref. sc. : Vicia disperma DC., 1813

Te-vese-e-t'ame(-de-champ)

Myosotis arvensis

Boraginaceae

Àutri noum : Ti-viéu-e-t'aìmi, Uei-de-l'enfant-Jèsu.

Noms en français : Myosotis des champs, Myosotis intermédiaire.

Descripcioun :
Aquéu te-vese-e-t'ame trachis di plano de coustiero fin qu'en mountagno. Es uno planto coumuno, mai pas toujour eisado de destria de si cousino. Dins lou group di flour pichoto (1 à 4 mm), soun pulèu li mai grando, si cambo soun un pau mai espésso (> 1mm), e emé d'enflourejado que fan mens de la mita de la planto. Se recounèis classicamen que li pecou di flour d'en bas dèvon èstre dous cop mai long que li sepalo di flour, mai sèmblo pas toujour lou cas.

Usanço :
Li flour podon se bouta dins lou mesclun. Se dis que li te-vese-e-t'ame soun vertuous contro l'enflamacioun, majamen pèr lis iue ("principe di signaturo").